Tuesday, February 26, 2008

عرض الفيلم التسجيلى القصير ..بيت حلوان



الفيلم التسجيلى القصير " بيت حلوان " هو مشروع تخرجى من مدرسة السينما المستقلة يدور الفيلم عن ساكنى بيت حلوان القديم الذى كان يستأجره النحات محمد هجرس وكان يستخدم نصفه كمنزل والنصف الاخر كأتيليه يتردد عليه الفنانين والاصدقاء كملتقى فنى وثقافى ..لازلت تعيش اسرة ابن النحات بالبيت الذى اختلف تماما عن السابق مع ظهور بعض الاقاويل حول بيع البيت من قبل المالك ..كيف ترى الاسرة والاصدقاء ذكرياتهم فى المكان وكيف ينظرون لهذه الذكريات فى الوقت الحالى... كيف يرون نصف البيت نصف الاتيليه


بيت حلوان

انتاج : مدرسة السينما المستقلة – جزويت القاهرة
تصوير : محمد عبد الرؤوف
مونتاج : احمد ابوسعدة
ساعد فى الاخراج : ميسان حسن – يقين حسام
سيناريو واخراج : بسام مرتضى


يعرض الفيلم يوم السبت القادم 1 مارس 2008 الساعة 6 مساء ..بجمعية النهضة العلمية والثقافية – جزويت القاهرة
منطقة الفجالة - داخل مسرح مدرسة العائلة المقدسة

يعرض الفيلم مع عروض تدريبات الدفعة الجديدة بمدرسة السينما المستقلة


..................................


بسام مرتضى

Thursday, February 07, 2008

معرض القاهرة الدولي للكتاب............



امبارح رحت المعرض .. كانت المرة التانية بالنسبة لي اروح السنة دي
وفي المرتين كنت مبشرتيش حاجات لنفسي
كنت رايحة في مهمة محددة اني اشتري حاجات للجامعة
في المرة الاولي نجحت في ده
في المرة التانية مقدرتش
صعب عليا نفسي اوي اني اروح مرتين ومشتريش اي حاجة لنفسي
ودخلت في صراع نفسي عظيم.
معيش فلوس ، ومفيش اي حاجة معينة عايزة اشتريها، بس في نفس الوقت تقاليد وذكريات 6 اعوام بتطاردني
كان جوايا مشاعر كتير ملخبطة جدا
حاسة بالهبل الشديد اللي خلي معرض الكتاب بالنسبة ليا مش اكتر من ذكريات الطفولة الجميلة
ولسه لحد النهاردة مش عارفة اخرج برة ده
المعرض:
· ماشية مع بابا بسعادة شديدة، بشتري حبة حاجات غريبة، وبتفرج عليه وهو بشتري حاجات اغرب
· حبة وشوش متعودة اشوفها كل سنة في المقهي الثقافي، بيكلوا حمص الشام وهمبروجر معفن
· شلة مدرسة ثانوي واحنا اعدين تخانق انهوا صالة الاول ، واللي كان ساعات بنتهي برويات عبير ( ومحدش يتريق )
· غضبي الشديد اما فجأة بدأ الاسلامين يكتروا في المعرض، ناس لابسة جلاليب بيضا ، وبيبصولنا بقرف شديد، وكنت بقي عايزة اقولهم لأ المعرض ده بتاعنا
· شلة اعدة رياض والاعدة بلا هدف طول النهار علي السور اللي ادام سرايا 2
· بسام وعاصم اول واعرفتهم، وهما واقفين عن سور الازبكية بيعملوا حورات صحفية، وبسام بيسألني ايه رأيك في تنظيم المعرض السنة دي.
· حفلة محمود درويش ، وانبهاري الشديد بيها ، مع ديوانه " لا تعتذر عما فعلت"
· مظاهرة فلسطين و العراق ( مش فاكرة)
· وفي الاخر منظري كل سنة وانا بجري عشان الحق اجيب كتابين قبل ماامشي، وانا بعيط من الم رجليا وكأنها اخر مرة في حياتي اشتري كتب، او اني الكتابين دول هما اللي حينقذوني من الجهل .
ياااااااااااااااااه حاجات كتير اوي
بس اكتشفت امبارح اني هي دي علاقي بالمعرض ، واللي عمرها ماكان ليها اي علاقة بالكتب نفسها، ليها علاقة بس بحبة الحاجات الكتير اللي كنت بعرف نفسي من خلالها ..

ملحوظة::
امبارح بعد كل الصراع النفسي الفظيع اشتريت حاجتين:
- 11 عدد من مجلة ميكي
- وكتاب في الجغرافيا ب 250 جنيه، علي انه كتاب في علم الاجتماع ..
( وماتت متأثرة بغبائها)